AD
李月婷 媒体人
每次经过陶街嘅音响铺，都会不知不觉谂起《无间道》。陈永仁同刘健明第一次见面，就系喺一间音响铺里边。本来唔太中意人头涌涌嘅陶街，因为呢个联想而觉得呢个地方特别有味道。
一到周末，特别中意动手整嘢嘅爸爸就会踩住部单车去打个转，风雨不改。每次去完陶街，屋企就会多咗啲好特别嘅玩意—袖珍电筒、全套电钻、充电风扇……甚至于装修旧屋嘅时候，佢仲搬咗台全新嘅抽油烟机过去，装好之后大赞“平靓正”。
当然，呢啲小玩意嘅质量令人不敢恭维。因为寿命太短，我曾经劝过佢唔好再嘥钱买呢啲无谓嘢，不过佢依然乐此不疲。后来谂下，呢位老人家去陶街，其实同我中意上淘宝买嘢一样—女士中意网购衫裤鞋袜，男士就中意去陶街买电器唱片小工具，陶街就系佢哋嘅淘宝。
所以话，陶街系“男人天堂”呢句话一啲都冇错。佢喺男士心目中嘅广百天河城，系一个充满乐趣嘅地方。即使旧年新陶街结业，附近解放北路、中山六路同埋六榕路嘅二手电器城依然门庭若市。“大陶街”名声在外，本地人都将佢视作广州嘅一张“名片”。不过，最近附近嘅将军东电器城传出要搬迁嘅消息，街坊感叹老城区嘅旧货市场一个接一个咁消失，真系唔知以后要去咩地方“购物消遣”喇。
